Биылғы оқу жылын облыс бойынша 5192 түлек тәмамдады. Үстіміздегі жылдың 10 наурыз бен 10 мамыр аралығында өз еріктерімен 3750 оқушы ҰБТ тапсыруға өтініш берді. Алайда ұлттық бірыңғай тестілеуде олардың 3652-сі ғана өз білімдерін сынады. 216 оқушы шығармашылық емтихан тапсырды. 1540 бала ҰБТ-ға қатысуға ниет білдірмеді. Тестілеу естихандары 20,21,22 маусымда 9 тестілеу орталығында өтті. Облыстық білім басқармасының мектепке дейінгі және орта жалпы білімді дамыту бөлімінің басшысы Светлана Темірғалиеваның айтуынша, биылғы ҰБТ барысында шәкірттеріміздің орташа балы 81,80 балды құрап отыр (өткен жылы 80,34 болған екен). 100-ден жоғары балды 823 мектеп бітіруші жинаса, 130 балдан жоғары көрсеткіш көрсеткен 30 оқушы бар (IT-лицейінде – 13, Теректі ауданында – 7, Орал қаласында – 6, С.Сейфуллин атындағы дарынды балаларға арналған облыстық мамандандырылған мектеп-интернатында – 2, Тасқалада – 1, Казталовта – 1). Облыс бойынша ең жоғары 138 балл облыстық дарынды балаларға арналған мамандандырылған ақпараттық-технологиялар мектеп-лицей-интернатының (IT-лицей) түлегі Нарқыз Базарғалиеваға тиесілі. Нарқыздан кейін жоғары ұпаймен екі түлегіміз дараланды. Олар – 137 балл жинаған қаладағы №47 ЖООБМ оқушысы Анжелика Степанюк пен теректілік түлек Мейрамбек Қадырбеков. Шекті балды (50 балл) жинай алмағандар саны – 253.