2016 жылдын 5 тамызында Батыс Қазақстан облысы білім басқармасының мектепке дейінгі, жалпы орта, техникалық және кәсіптік білім беру ұйымдарының облыстық оқу-әдістемелік кабинеті және облыстық балалар-жасөспірімдер туризмі және экология орталығының ұйымдастыруымен Қ.Мырзалиев атындағы мәдениет орталығында «Қазақстан Республикасында үздіксіз білім беру жүйесіндегі тәрбие тұжырымдамасына сәйкес білім беру ұйымы музейлері жұмысының негізгі бағыттары» тақырыбында мектеп музей жетекшілерінің секциясы өткізілді.

Кеңес отырысының жұмысында баланың өзі-өзі дамытудағы мектеп музейінің мүмкіндігі, мектеп пен музейдің байланысы, мектеп музейінің ғылыми зерттеу қызметіне оқушыларды тарту арқылы туған өлке тарихын оқуға ынталандыру, балалармен жұмыстанудағы мектеп музейі қызметінің дәстүрлері мен жаңалықтары мәселелері қаралды.

Секция барысында балалар туризмі тарихы музейінде туристік-өлкетанулық, экологиялық экспедициялар, «Туристік абонемент» музей қорының негізі, Серебряково жалпы білім беретін орта мектеп музейінде «Ауыл мектебінде музей жұмысын ұйымдастыру» бойынша шебер сыныптар өткізіліп, Облыстық тарихи - өлкетану музейінің қор бөліміне «Уақыт арқылы саяхат» тақырыбында саяхат жасалды.

Секцияны қорытындылау барысында мектеп музей жұмысының негізгі  бағыттары,  рөлі туралы және музей экспонаттарының түпнұсқасы негізінде жас ұрпаққа патриоттық тәрбие берудің әдістері мен практикалық сабақтар және мектеп музейлерінің рөлін белсендіру туралы ұсынымдар қабылданды.