Ағымдағы жылдың 22 тамызы күні Зеленов ауданының Мичурин жалпы орта білім беретін мектебі базасында шағын жинақты мектептердегі білім беру үдерісінде білім беру мазмұнын жаңарту, мұғалімдерінің ғылыми-зерттеу жұмыстарын дамыту және туындаған проблемаларды шешу жолдарын айқындау, заманауи педагогикалық технологияларды қолдану арқылы дәстүрлі және дәстүрден тыс жұмыс түрлері мен инновациялық әдістерді үйлестіре білу мақсатында «Білім беру мазмұнын жаңарту жағдайында шағын жинақталған мектептердің ерекшеліктеріне сәйкес педагогикалық үрдісті ұйымдастыру жолдары» тақырыбында шағын жинақталған мектеп педагогтерінің тамыз кеңесінің секциялық отырысы өткізілді.

Секцияға аудандық (қалалық) білім беру бөлімінің мамандары, шағын жинақты мектептер мен тірек мектептер (ресурстық орталықтар) басшылары және магниттік мектептің мұғалімдері, барлығы 52 адам қатысты.

Секция жұмысы үш блоктан тұрды:
1. Мектеп сабағы «Шағын жинақты мектептегі біріктірілген сыныптарында білім беру мәселелері мен шешу жолдары».
2. Әдістемелік идея «Жаңашылдыққа қадам».
3. Ұстаз шеберханасы «Жаңаша оқыту – жетістік көзі».

Семинар барысында шағын жинақты мектептегі инновациялық технологиялар мен тәжірибелер; жаңартылған білім беру мазмұны жағдайында оқу үдерісіндегі критериалды бағалаудың тиімділігі; біріктірілген бастауыш сыныптардағы күнтізбелік-тақырыптық жоспардың тиімді жолдары; біріктірілген сыныптарында бір пәндік сабақтарды ұйымдастырудың әдіс – тәсілдері мен өзіндік жұмысын ұйымдастырудың және өткізу әдістемесі туралы мазмұнды мәліметтер айтылды.

Секция жұмысы соңында қатысушылар өз ойларын айтып, пікір алмасты, ұсынбаларын берді.