Қазақстан Республикасы Білім және ғылым министрлігі және "Назарбаев Зияткерлік мектептері" дербес білім беру ұйымының ұйымдастыруымен Астана қаласында 8-9 қазан күндері робототехника олимпиадасы өтті.

Еліміздің әр түкпірінен жиналған 200-ден аса оқушы халықаралық робот олимпиадасының ережесі бойынша бес бағытта сынға түсті.

Орал қаласындағы Назарбаев Зияткерлік мектебінің оқушылары бұл олимпиадада олжалы болды. Атап айтқанда, 11-сынып оқушылары Әділет Бекетов пен Ербол Абай негізгі категорияның ересектер тобында 1-орын, орта жастағылар арасында 8-сынып оқушылары Жәңгір Баянов пен Данияр Серік 1-орын және студенттер арасында 11-сынып оқушысы Шынболат Тналиев бірінші орын иеленді.

Сонымен қатар студенттер сайысында Орал қаласындағы Жоғары техникалық мектеп студенттері Нұрғиса Апбас (1-орын), Дарын Ибраимов мен Бекзада Сәлім (2-орын) жеңіс тұғырынан көріне білді. Жеңімпаздар қараша айында Делиде өтетін халықаралық жарысқа жолдама алды. Сондай-ақ, шығармашылық категориясында Назарбаев Зияткерлік мектебінің 10-сынып оқушылары Динара Алманова, Айдана Асанғалиева және Дильназ Қуановадан құралған команда екінші орын иеленді. Олар суда қоқыс қалдықтарын жинайтын робот құрастырған болатын.

Сондай-ақ облыс командасы құрамасында болған Тасқала ауданындағы мектептен тыс жұмыс орталағының оқушылары Нұртілек Ерлан мен Қайсар Қазыбаев та осы категорияда «TUKS»жобасымен үшінші орын иеленді.